ഡോ. എം എസ് മൗലവി -അതുല്യ പ്രതിഭ - എം. തമീമുദ്ദീൻ

        വിദ്യാഭ്യാസ വിചക്ഷണൻ, അറബി ഭാഷാ പണ്ഡിതൻ, ലേഖകൻ,  പ്രഗല്ഭനായ അദ്ധ്യാപകൻ,  സാംസ്കാരിക നായകൻ, മതപ്രഭാഷകൻ,  സംസ്ഥാന അറബിക് സ്പെഷ്യൽ ഓഫീസർ,  കേരള അറബിക് മുൻഷിസ്  അസോസിയേഷൻ സംസ്ഥാന ജനറൽ സെക്രട്ടറി, കടയ്ക്കൽ  എം എസ് എം അറബിക് കോളേജ് ഡയറക്ടർ എന്നീ നിലകളിൽ വ്യക്തിമുദ്ര പതിപ്പിച്ചിട്ടുള്ള ഡോക്ടർ എം സുലൈമാൻ മൗലവി എന്ന എം എസ് മൗലവി വിട പറഞ്ഞിട്ട് രണ്ട്  വർഷമായി.  അറബി ഭാഷയ്ക്കും, പൊതുസമൂഹത്തിനും തീരാനഷ്ടമാണ് എം. എസ് ന്റെ  വിയോഗം . കൊല്ലം ജില്ലയിലെ  കൊട്ടാരക്കര താലൂക്കിലെ  കടയ്ക്കൽ, 

          മുതയിൽ മുസ്ലിം ജമാഅത്തിന്  സമീപം പള്ളിക്കുന്നിൽ പരേതരായ മുഹമ്മദ് കുഞ്ഞ് ലബ്ബ, ബീവി കുഞ്ഞ് ദമ്പതികളുടെ ഏഴാമത്തെ മകനായാണ് എം. സുലൈമാൻ ജനിച്ചത്. ദരിദ്ര കുടുംബത്തിൽ ജനിച്ച ഇദ്ദേഹം സ്കൂൾ വിദ്യാഭ്യാസവും മതപഠനവും സമാന്തരമായി തന്നെ നേടാൻ അവസരം ലഭിച്ചതോടെ ചെറുപ്രായം മുതൽ പ്രസംഗിക്കാനും ക്ലാസ്സെടുക്കുവാനുമുള്ള  പ്രാവിണ്യം നേടുകയുണ്ടായി.

      അഫ്സലുൽ ഉലമ,  എൽ ടി ടി സി തുടങ്ങിയ ബിരുദങ്ങൾക്ക് പുറമെ അറബി ഭാഷയിലും ഇംഗ്ലീഷ് സാഹിത്യത്തിലും ബിരുദാനന്തരബിരുദവും, വിദ്യാഭ്യാസത്തിൽഎംഫിൽ,  അറബി സാഹിത്യത്തിൽ പി എച്ച് ഡി തുടങ്ങിയ ബിരുദങ്ങൾ നേടിയ ബഹുഭാഷാ പണ്ഡിതൻ ആണ് ഡോ.എം  എസ് മൗലവി.

     പ്രൈമറി, സെക്കൻഡറി തലങ്ങളിൽ അധ്യാപകൻ,   അധ്യാപക പരിശീലന കേന്ദ്രം ഇൻസ്ട്രക്ടർ, മുസ്‌ലിം വിദ്യാഭ്യാസ ഇൻസ്പെക്ടർ, സംസ്ഥാന അറബിക് സ്പെഷ്യൽ ഓഫീസർ എന്നീ തസ്തികകളിലായി 34 വർഷത്തെ ഔദ്യോഗിക സേവനം.

           സർവീസിൽ നിന്ന് വിരമിച്ചതിനു ശേഷം 2007 സെപ്റ്റംബർ മുതൽ കടയ്ക്കലിൽ ഖുർആൻ കോളേജ് സ്ഥാപിച്ച്  വിശുദ്ധ ഖുർആനിന്റെ  വിശദമായ പഠനത്തിന് നേതൃത്വം നൽകിവരുന്നു. ഇപ്പോൾ കേരള സർവകലാശാല അറബി വിഭാഗം റിസർച്ച് ഗൈഡായി  സേവനമനുഷ്ഠിക്കുകയും ആയിരുന്നു. വിവിധ പരീക്ഷാ ബോർഡുകളിൽ അംഗമായിട്ടുണ്ട്. ക ടയ്ക്കൽ എം എസ് എം അറബിക് കോളേജ് പ്രിൻസിപ്പലും,  ഡയറക്ടറും,  വിദ്യാഭ്യാസ കോംപ്ലക്സ് ചെയർമാനുമായിരുന്നു. അറബി,  ഇംഗ്ലീഷ്, മലയാളം ഭാഷകളിൽ രചനകളും ഉണ്ട്ഡോക്ടർ മുഹ്‌യുദ്ദീൻ ആലുവായ് ജീവിതവും സാഹിത്യ സേവനങ്ങളും  എന്ന അറബി ഗ്രന്ഥം കേരള യൂണിവേഴ്സിറ്റി ബി എ  കോഴ്സിന് പാഠപുസ്തകമാണ്. അദ്ദേഹം രചിച്ച അറബിക് എജുക്കേഷൻ ഇൻ കേരള എന്ന ഇംഗ്ലീഷ് റഫറൻസ് പൊതുവിദ്യാഭ്യാസവകുപ്പ് 2006 ൽ പ്രസിദ്ധീകരിക്കുകയുണ്ടായി.

     അറബി ഭാഷ,  പൊതു വിദ്യാഭ്യാസം,  ഇസ്‌ലാമിക വിജ്ഞാനീയങ്ങൾ,  വിശുദ്ധ ഖുർആൻ  തുടങ്ങിയ വിഷയങ്ങളെ കേന്ദ്രീകരിച്ചുകൊണ്ട് സംസ്ഥാനമൊട്ടാകെ 250 ൽ പരം  വിദ്യാഭ്യാസ സെമിനാറുകളും,  ചർച്ചാ ക്ലാസ്സുകളും സംഘടിപ്പിച്ചിട്ടുണ്ട്കൊല്ലം,  ആലപ്പുഴ, പത്തനംതിട്ട ജില്ലകളിൽ എഴുപതിൽ പരം അറബി സാഹിത്യ മേളകൾ ആവിഷ്കരിച്ച് നടപ്പിലാക്കി. അറബി കലോത്സവത്തിന്റെ  ഉപജ്ഞാതാവായാണ്  അദ്ദേഹം അറിയപ്പെടുന്നത്. പൊതുവിദ്യാഭ്യാസ രംഗത്ത് സ്കൂൾ കലോത്സവങ്ങളോടൊപ്പം  2000- 2001 അധ്യയന വർഷം മുതൽ അറബി സാഹിത്യോത്സവങ്ങളും  നടപ്പിലാക്കുന്നതിന് നേതൃത്വം നൽകി. വർഷംതോറും ജില്ലാ,  സംസ്ഥാന തലങ്ങളിൽ അറബി അധ്യാപക സംഗമങ്ങളും  സാഹിത്യ മത്സരങ്ങളും ഏർപ്പെടുത്തി. അധ്യാപകർക്ക് ക്യാഷ് അവാർഡുകളും, മെറിറ്റ് സർട്ടിഫിക്കറ്റുകളും ഏർപ്പെടുത്തി

     40 വർഷമായി വിവിധ സ്ഥലങ്ങളിൽ അറബി കോളേജുകൾ സ്ഥാപിച്ച് ആയിരക്കണക്കിന് അറബി അധ്യാപകരെ  വാർത്തെടുത്തു.50 വർഷക്കാലം കൊണ്ട് വിലയ്ക്കുവാങ്ങി സൂക്ഷിച്ച വിവിധ ഭാഷകളിലെ 15 ലക്ഷത്തോളം രൂപ വിലയുള്ള നാലായിരത്തോളം ഗ്രന്ഥങ്ങൾ പൊതുസമൂഹത്തിനു സംഭാവനചെയ്ത് കടയ്ക്കലിൽ റഫറൻസ് ലൈബ്രറി സ്ഥാപിച്ചു. സംസ്ഥാന അറബിക്  സ്പെഷ്യൽ ഓഫീസർ ആയിരുന്നപ്പോൾ മദ്രസ നവീകരണ പദ്ധതി സംസ്ഥാനത്ത് വിജയകരമായി നടപ്പാക്കുന്നതിന്  ഉന്നത നേതൃത്വം വഹിക്കുകയും സംസ്ഥാനത്തുടനീളം ബോധവൽക്കരണ സെമിനാറുകൾ സംഘടിപ്പിക്കുകയും നൂറുകണക്കിന് മദ്രസകൾക്ക് കേന്ദ്ര സർക്കാരിന്റെ ഗ്രാൻഡുകൾ നേടിക്കൊടുക്കുന്നതിന് നേതൃത്വം വഹിക്കുകയും ചെയ്തു.

 മുസ്ലിം എംപ്ലോയീസ് കൾച്ചറൽ അസോസിയേഷൻ, തിരുവനന്തപുരം മുസ്ലിം അസോസിയേഷൻ എന്നിവയിലെ സജീവസാന്നിധ്യമായിരുന്നു.

    അറബി ഭാഷാ അധ്യാപന മേഖലയിൽ എന്നപോലെ വിദ്യാഭ്യാസ-സാംസ്കാരിക സാമൂഹ്യ രംഗങ്ങളിലെ സേവനങ്ങളെയും സമഗ്ര സംഭാവനകളെയും മാനിച്ചുകൊണ്ട് സംസ്ഥാനത്തിലെ  വിവിധ കേന്ദ്രങ്ങളിൽനിന്ന് വിവിധങ്ങളായ അവാർഡുകൾ ലഭിച്ചിട്ടുണ്ട്. പഠന ഗവേഷണ രംഗത്തെ പ്രഗല്ഭ സേവനം പരിഗണിച്ചുകൊണ്ട്  പ്രതിഭ അവാർഡ്,             വിദ്യാഭ്യാസ മേഖലയിലെ സംഭാവനകൾ കണക്കിലെടുത്ത് വിദ്യാഭ്യാസ പ്രചാരക പുരസ്കാരം, മികച്ച പി എച്ച് ഡി തിസീസിന്  മുസ്ലിം അസോസിയേഷൻ ഏർപ്പെടുത്തിയ എസ് എം എ കരീം ചാരിറ്റി അവാർഡ്, വിദ്യാഭ്യാസ മേഖലയിലെ സമഗ്ര സംഭാവനകൾക്കുള്ള വക്കം മൗലവി അവാർഡ്,  അറബി ഭാഷ രംഗത്തെ സമഗ്ര സംഭാവനകൾക്ക് ആലുവ മനാസ്സ് ഫൗണ്ടേഷൻ ഏർപ്പെടുത്തിയ ഡോക്ടർ മുഹ്‌യുദ്ദീൻ ആലുവായ് മെമ്മോറിയൽ അവാർഡ്, കേരള അറബിക് മുൻഷിസ് അസോസിയേഷൻ ഏർപ്പെടുത്തിയ പ്രഥമ സി എച്ച് മുഹമ്മദ് കോയ അവാർഡ്. എന്നിവ അവയിൽ ചിലതാണ്.

       ഡോ. എം എസ് മൗലവിയെ കെ. എ. എം. എ ക്ക് മറക്കാനാകില്ല. ഡിസംബർ 18 അന്താരാഷ്ട്ര അറബി ഭാഷാ ദിനത്തോടനുബന്ധിച്ച് പൊതുവിദ്യാഭ്യാസ വകുപ്പിന്റെ സഹകരണത്തോടെ ഒന്നു മുതൽ പന്ത്രണ്ട് വരെയുള്ള പൊതുവിദ്യാലയങ്ങളിലെ വിദ്യാർഥികൾക്കായി  സംഘടന നടത്തിയ അറബി ഭാഷ ക്വിസിന്റെ സംസ്ഥാനതല ജേതാക്കൾക്ക് എംഎസിന്റെ പേരിലുള്ള മൊമെന്റോ യും ക്യാഷ് അവാർഡും ആണ് സമ്മാനിച്ചത്.  കെ എ. എം. എ യുടെ എഴുപതാം  സംസ്ഥാന സമ്മേളനം മുതൽ ഡോക്ടർ എം എസ് മൗലവി  സ്മാരക അവാർഡും ഏർപ്പെടുത്തിയിട്ടുണ്ട്. 

          അറബി ഭാഷക്ക് വേണ്ടി ജീവിതം സമർപ്പിച്ച മർഹൂം ഡോക്ടർ എം എസ് മൗലവിക്ക് അല്ലാഹു സ്വർഗം നൽകി അനുഗ്രഹിക്കട്ടെ എന്ന പ്രാർത്ഥനയോടെ,  

        എം . തമീമുദ്ദീൻ  (കെ. എ. എം. എ )

 സംസ്ഥാന ജനറൽ സെക്രട്ടറി കേരള അറബിക് മുൻഷിസ്  അസോസിയേഷൻ

       Mob-9567631001

       Email -thameemudeentky@gmail. Com